Azərbaycan Nar İstehsalçıları və İxracatçıları Assosiasiyasının təşkil etdiyi "Nardan doğan rənglər" adlı foto müsabiqəsinin qaliblərinin adına aydınlıq gəlib. 

15 sentyabr tarixindən etibarən start verilən və 460 iştirakçının iştirakı ilə baş tutan müsabiqənin 3-cü seçim turu bu gün başa çatıb.

İlkin mərhələdə münsiflər heyətinin qərarları əsasında seçilən fotolar, sonrakı mərhələdə ANİİA-nın rəsmi instagram hesabına izləyicilərin səsverməsi üçün yerləşdirilib.

20 Oktyabr tarixindən başlayaraq, 25 Oktyabr tarixinə qədər davam edən  səsvermə mərhələsi izləyicilərin böyük maraqına səbəb olub. 

Sonuncu gündə artıq qaliblərin adı məlum olub. 10 ƏN yaxşı foto arasında izləyicilərin ən böyük maraqına səbəb olan və ən çox bəyəni (LİKE) qazanan foto Nicat Abışov adlı iştirakçının təqdim etdiyi foto olub. 6 min 550 like əldə edən iştirakçı müsabiqənin qalibi adını qazanıb. 

Müsabiqədə ikinci yerin sahibi Tural Nüsəlov 5 min 627 , üçüncü yerin sahibi isə 2 min 847 like ilə Nigar Təhməzova adlı xanım iştirakçı olub. 

Müsabiqənin qaliblərinin mükafatlandırma mərasimi 29 Oktyabr tarixində "Qalereya 1969" sərgi salonunda keçiriləcək.

Azərbaycan Nar İstehsalçıları və İxracatçıları Assosiasiyası müsabiqədə iştirak edən və bu həyacanı bizimlə yaşayan hər kəsə öz təşəkkürünü bildirir!